|
Gürcüstan dövləti müstəqillik qazandıqdan sonra ölkədə
qeyri-gürcü dilində olan nəşrlərin sayının çoxalması danılmaz faktdır.
Azərbaycandilli nəşrlərin isə Gürcüstanın qeyri-gürcü dilli mətbuatında həmişə
xüsusi yeri olub. Tiflisdə 1906-cı ildə nəşrə başlanan «Molla Nəsrəddin» jurnalı
buna ən bariz nümunədir.
Müasir dövrümüzdə də Gürcüstanda çapdan çıxan Azərbaycan dilli qəzetlərin sayı
ürək açandır. Son dövrlərdə isə Gürcüstanın Azərbaycan dilli nəşrləri arasında
sağlam rəqabət hiss olunmaqdadır. Bu, əlbəttə Gürcüstanın Azərbaycan dilli
mətbuatında canlanma olduğundan xəbər verir. Azərbacan dilli nəşriyyat artdıqca,
onlar arasında olan sağlam rəqabət özünü açıq-aşkar göstərir. Bu isə onların
daha da mükəmməlləşməsinə və təkminləşməsinə imkan yaradır.
Gürcüstanda yaşayan azərbaycanlılar, Azərbaycan dövləti üçün böyük maraq kəsb
edir. Gürcüstanda yaşayan soydaşlarımızın həyatı, problemləri və gündəmi Azərbaycan mediyası üçün də yetərincə aktualdır. Bir çox media vasitələri, xüsusilə də
internet portallar öz xəbər gündəliklərində Gürcüstana və burada yaşayan
azərbaycanlılara xüsusi yer ayırır.
Müasir dövrümüzdə internetin rolunun mühümlüyü və vacibliyi danılmaz bir
həqiqətdir. İnternetin əhatə etdiyi mühit bir çox nəşrlərin yayılma arealından
xeyli çoxdur. Məhz buna görə də artıq bütün dünyada məşhur olan qəzet və
jurnalların veb versiyaları da mövcuddur. Bununla yanaşı xəbər daşıyıcısı olan
internet portalların sayı günü-gündən artmaqdadır.
|
